ألبوم صور

دقيقة
صور

في ناس حياتها ماشية زي ما هي وناس محتاجة ألبوم صور تخزن فيه مجمل عمرهم اللي عاشوه سنين طويلة وهما بيسجلوا كل لحظة حلوة ووحشة في حياتهم عشان كده فكرتوا في مرة تجمعوا صوركم القديمة وتحطوها في ألبوم صور وتفضلوا تتفرجوا على كل صورة بهدوء وتأني، صورة جمعتكم بأهلكم أيام الطفولة، صورة وأنتم مع أعز أصحابكم، صورة جمعتكم بأعز الناس على قلبكم، صورة أيام التخرج؟!
وبعد ما تتفرجوا تفتكروا أد إيه الأيام كانت حلوة وإنكم نفسكم ترجعوا تاني لورا بتاع 10 سنين أو أقل عشان تعيشوا اللحظة الحلوة نفسها اللي عشتوها قبل كده ومش قادرين تعيشوها تاني وأنتم كبار، اللحظة الحلوة دي اللي عمرها ما بتتقدر بتمن، يمكن وقتها تحنوا للأيام دي من تاني خاصة إن الصور دي بتدخل في بند الذكريات.
فكرتوا في مرة تعملوا  لكل صورة برواز وتعلقوها عندكم في البيت وطول ما أنتم رايحين وجايين بتشفوها فبتفتكروا لحظاتكم الجميلة.
فكرتوا في مرة إن في صور لازم تخفوها من حياتكم لأنها بتسببلكم ألم كبير أو جرح معلم وعمره ما بيتشال إلا بالنسيان، اللي عمره ما بيحصل إلا لو محينا الصور دي وشلناها خالص من الذاكرة.
الصور دي هي ألبوم حياتنا اللي بتمر زي شريط السينما، يا إما هتشعروا بالنشوة والفرحة يا إما هتصيبكم حالة اكتئاب.
فكرتوا في مرة تعملوا ألبوم صور؟!