بالهنا والشفا: إذا كنت تحب ساندوتشات البرجر فعليك بـ« برجر فاكتوري »

دقيقة
بقالي فترة بحاول احضر مطاعم البرجر اللي في مصر
قررت اني انزل اجرب محل كنت حاطه في الto do list  بتاعتي بتاعت المطاعم والكافيهات
و بما اني بحاول بقالي فتره احسر المطاعم بتاعت البرجر اللي فتحت مؤخرا في مصر بطريقه مرعبه و كان علي راس القائمه لوسيالز مطعم في المعادي بسمع عنه اساطير بس برجر فاكتوري برضه سمعت عنه اساطير فى قولت ده اقرب .

نزلت اتمشيت كتير لحد حسن صبري من بيتي الجو كان حلو جدا يبشر ان اليوم حلو .
وصلت المطعم ديكوره من برا يشد مرسوم عليه جرافيتي من برا اشكال بوهيميه.
دخلت قابلني الجرسون بلباقه و شكله لذيذ قعدت قولتله اقترح عليا اكتر حاجه الناس بتقول عليا فشيخه و تجنن و كدا قالي ٣ اختيارات وانا اصلا قبل ما اروح كنت عامل ريسيرش عنه و ساأل ناس كتير بدل ما انا اروح و البس ! عيب
المهم اخترت cowboy burger
عليه بيكون بيف و اونيون رينجز محمره و صوص باربكيو و چوسي نقيته ميديم ويل (التسوية) جالي شوية (ويل دون ) !!
طعمه الحقيقه كان خطيييير اللحمه نضيفه جدا ١٠٠ ٪angus beef(علي كلامهم)

طعمه كان فعلا زي ما كاتبين علي المنيو بيدوب في البق والجبنه عالميه بتفضل تشد معايا لحد مترين قدام والبرجر طعمه لحمه نضيفه مش كاوتش و قرف زي بقيه المطاعم
نزلوا معاه بطاطس عاديه جدا مش مميزه ابدا ولا جديده و طعمها عادي بس عجبني فكرة الفلفل الاسود اللي مش مطحون وانت بطحنه فريش في وقتها طعمه مختلف و حلو

كاتشب طعمه نضيف والمكان مختلف جدا و مليان رسومات مشعوذة بس حلوة و مديا مود مختلف عن كل مطاعم البرجر الساذجه الدسكورات الممله الامريكيه التقليديه و المقلدة بشكل سئ
عجبني في المطعم ده كمان الحوض بتاعهم معندهمش حمام و قرروا يدخلوا الحوض في الديكور و مكانه جنب الكاشير بيجيبلك الشيك في كوباية و بتحاسب و بتمشي.

حجم الساندوتش مش كبير بس حبيته جدا المطعم ده صغير و بيقدم أكل حلو

الاسعار

٣٨ جنيه الوجبه من غير بيبسي ولا اي حاجه

بالضريبه و الخدمه ٤٣

اسعاره بالنسبه لماكدونالدز مش فارقه كتير ويمكن اقل بس الطعم فارق بمراحل مفيش مقارنه اصلا
غير طبعا ان ده لحمة و ماكدونالدز حجات مش عارفين مصدرها و مش واضحه
اقدر اقول عليه في قائمه احلي مطاعم برجر في مصر

برجر فاكتوري ، شارع حسن عاصم يعتبر علي ٢٦ يوليو عند الاشارة

الزمالك